「不戰、不和、不守、不死、不降、不走」，第二次鴉片戰爭中「六不總督」葉名琛真係出曬名，面對英法聯軍兵臨城下，佢居然走去求神問卜，令廣州最終淪陷。其實迷信唔緊要，不過累人累物就唔好啦。

1857年12月，英法聯軍進逼廣州城，兵艦聚集黃埔，甚至發出最後通牒，限葉名琛四十八小時內投降。大件事，點算好？身為兩廣總督嘅葉名琛選擇佢深信嘅扶乩。當時乩文顯示：「姑待之，過十五日（12月30日），必無事。」就係依句「過幾日無事」，決定咗廣州嘅命運。

英法聯軍28日率領戰艦同部隊攻打廣州，當時「連珠炮發」嘅情形好似千千萬萬嘅爆仗響起，唔少清兵逃命。聯軍次日攻入城內，30日佔領廣州。據講當英軍衝入總督衙門，葉名琛居然仲批緊公文。淪為俘虜嘅葉名琛被押解去停响香港嘅軍艦「無畏號」，送至英屬印度加爾各答囚禁，最終絕食而亡。而廣州淪陷之後，一直由聯軍控制，直到第二次鴉片戰爭結束。

原圖嚟自網絡。