以前睇啲警察電影、電視劇，不時都會聽到「你守咩環頭」之類嘅問題，但原來「環頭」呢個詞係同以前殖民政府將港島區分為「四環九約」嘅規劃有關。

說話响1857年，香港政府對維多利亞城（現時中西區同灣仔區一帶）展開行政規劃，將城入面嘅市區劃分做「四環九約」，「四環」包括西環、上環、中環同下環（軍器廠街至銅鑼灣一帶），之後再細分九個區域，稱之為「九約」，好似堅尼地城到石塘咀一帶，就被稱之為「一約」。當時香港嘅市民會將「四環」叫做「環頭」，「四環」以外就叫做「環尾」，於是喺「四環九約」之內嘅差館都會叫做「環頭差館」，而「四環九約」以外嘅差館就叫做「環尾差館」。到咗而家，「環頭」演變成「警區」咁解。

圖片係當年位於禮頓道同波斯富街交界嘅一號差館，取自網絡。