話說早排同事之間爭論緊娛樂圈邊位最靚，你一言我一語嘈到拆天。講開靚女，又點可以唔提中國四大美女？一般講法認為，沉魚落雁、閉月羞花分別代表四位古代美人，今日率先同大家介紹靚到「沉魚」嘅西施。

傳說於春秋時期，越國人西施响河邊浣紗，啲魚望到靚女，居然唔記得游水而沉落水底。不過「沉魚落雁」據講出自《莊子·齊物論》，「毛嬙麗姬，人之所美也；魚見之深入，鳥見之高飛，麋鹿見之決驟。四者孰知天下之正色哉？」話啲人認為同西施差唔多時期嘅毛嬙同美女麗姬係絕色，不過啲魚、雀、鹿見到，就會潛水、飛走同跑開，莊子意思即係話，美醜依家嘢好主觀，並無絕對或者一定嘅標準。不過後人將依個典故用嚟形容西施同王昭君嘅美，令意思完全唔同咗。

講返西施，佢究竟點靚法？連病咗都咁靚。話說佢有次病咗，於是捧心皺眉，因此後人會用「西施捧心」嚟代表病美人。而住响附近嘅東施見到西施咁嘅樣，好學唔學走去扮人皺眉，嚇到隔離左右彈起，於是大家就用東施效顰嚟表示亂咁模仿而變成反效果嘅情況。下次再同大家講講另外三位美女。

圖為郭羨妮飾演嘅西施。圖片嚟自網絡。