平時睇電視劇，都會見到一啲唔駛著制服嘅便衣警察，戲入面通常都會叫佢哋做「便衣」或者CID。但原來以前佢哋仲有其他稱呼㗎喎！

喺警隊成立初期，呢啲便衣因為平時負責暗中偵查案件，於是被稱為「暗差」，後來佢哋嘅工作越來越繁雜，所以又被叫做「雜差」，亦暗喻「打雜」。據講，以前啲警員知道要被調去做雜差，就會準備一啲私伙裝備，因為八十年代之前，佢哋除咗獲分配支槍外，其他一律唔提供。當然亦都有講法話，係雜差中意自己準備。點都好，雜差嘅槍袋、手扣袋同子彈套等裝備，通常都會出動私伙嘢，有啲雜差會搵相熟皮具店舖訂造，甚至印上唔同嘅花紋，所以個個雜差嘅裝備都係好獨一無二。

除此之外，以前雜差都會訂造一啲短袖夏威夷恤衫、獵裝等，方便遮住個槍袋，當時警員月薪大約五、六百，剩係買呢啲裝備同衣物，分分鐘都洗曬成個月糧咁滯，負擔都唔輕。

圖為六十年代尾雜差嘅槍袋同後備子彈套。網絡圖片