早排講到中國四大美人提到「沉魚落雁」依個成語，代表人物除咗西施之外，仲有西漢元帝時期嘅王昭君。

根據《後漢書》記載，昭君當年入宮，幾年之間都無見過皇帝，後嚟匈奴單于呼韓邪來朝，請求和親，昭君於是舉手話去。當時元帝揀咗五朵金花過呼韓邪，嗰一刻大家先見到靚爆鏡嘅昭君，走寶嘅元帝意欲反口，但又唔想失信於人，唯有讓昭君遠嫁。

點解昭君一路都見唔到皇帝？傳說話宮廷畫師毛延壽專門幫入宮嘅女子畫畫像，啲女仔為求得到皇帝青睞，不惜洗錢賄賂毛延壽，等自己幅畫像有咁靚得咁靚。而正直嘅昭君因為無出到錢，所以被畫到普普通通，於云云靚女之中毫不起眼。

講返昭君，佢响出嫁嘅路途中滿懷愁緒，於是彈起琵琶。美女嘅琴音肝腸寸斷，連飛過嘅大雁唔知掛住望定掛住聽曲，唔記得自己飛緊，搞到跌咗落嚟，所以後人多數以昭君嚟代表「落雁」，簡單而言，都係用嚟形容緊靚女。

話說生咗兩件嘅昭君於呼韓邪死後表示想返嚟，點知成帝叫佢跟從當地習俗，嫁予呼韓邪個仔、新任單于，最後佢於匈奴逝世。

圖為《昭君出塞》劇照。圖片嚟自網絡。