歷代帝王家嘅婚姻大多係政治聯姻，大家各取所需，無乜感情可言，但係今日阿史講嘅錢皇后就係個例外。

明英宗朱祁鎮15歲果年，祖母就幫佢冊立咗出身平平嘅錢氏為皇后，英宗同錢皇后成婚後感情甚篤。英宗見錢皇后嘅娘家人官階比較低，打算為佢哋封侯，但錢氏覺得無功受祿會影響丈夫嘅聲譽，多次謝絕封侯。錢皇后一家因此成為明朝所有皇后家族裡面，唯一無受封嘅家族。

土木堡之變後，英宗被瓦剌俘虜，錢皇后得知消息之後，日日以淚洗面，向神明祈求丈夫可以平安歸來，喊到攰就索性喺佛堂度瞓。久而久之，錢皇后其中一隻腳變到不良於行，仲喊盲咗一隻眼。之後，英宗雖然被迎回宮，但就被英宗嘅細佬代宗軟禁喺南宮。英宗同錢皇后喺南宮嘅生活就連日常飲食都維持唔到，但兩人依然相依為命、互相扶持。錢皇后仲同其他幽禁喺南宮入面嘅嬪妃宮女趕製繡品，補貼生活。後尾代宗大病，英宗於「奪門之變」中復位，依然立殘疾嘅錢氏為后。英宗死前留低遺言：「皇后他日壽終，宜合葬」，並廢除明代實行多年嘅妃嬪殉葬制度，令錢皇后得以壽終正寢。

圖為錢皇后畫像以及《女醫明妃傳》嘅錢皇后劇照，原圖嚟自網絡。