有睇過《三國演義》嘅史友，相信都聽過諸葛亮「草船借箭」嘅故事，阿史今次就想講吓一個發生喺唐朝同「借箭」有關嘅真實故事。

話說唐玄宗在位時爆發安史之亂，節度使安祿山派降將令狐潮帶住4萬士兵進攻雍丘城，縣令張巡就帶住城內3000左右將士死守。根據《新唐書》記載，張巡死守一段時間之後，發覺唔夠箭用，就諗到一條妙計：命令士兵紮咗過千個稻草人，又將黑衫披落稻草人上面，再用繩吊落城牆，營造出好似有黑衣人爬落城牆咁。敵軍見到，以為張巡派黑衣人出城偷襲，於是就放箭射殺。到咗第二朝，敵軍先知原來係稻草人，而張巡咁樣就呃咗一大批箭返嚟。

張巡之後「重施故技」，敵軍見到啲黑衣人，以為自己好醒，唔會再上當放箭，點知張巡真係派咗班黑衣精兵出去偷襲，敵軍即刻陣腳大亂撤退十幾里外，張巡就係咁憑住呢兩個「妙計」借到箭，死守雍丘。

圖片取自網絡