早排搭車，旁邊坐咗位小朋友，佢突然好似技安咁大開金口，「小明坐火車，坐火車到那一方」，此歌一出，誰與爭鋒？頓時全車唔少乘客望住佢。講開火車，大家又知唔知中國幾時有鐵路「窿隆隆隆」？

話說响同治年間（公元1863年），英國同法國嘅洋行建議修築鐵路，不過被清朝拒絕。英國商人唔肯放棄，佢哋响北京宣武門外自己整咗條全長500米嘅展示鐵路，用嚟賣廣告，宣傳吓鐵路有幾好。不過從來見過火車嘅清朝人望到火車行駛，即刻好驚，仲認定依種交通工具係「妖物」。朝廷眼見火車引起恐慌，於是以「觀者駭怪」為理由，拆咗條鐵路。

而中國第一條自建鐵路——唐胥鐵路就係响十幾年之後先出現，當時北洋通商大臣李鴻章倡議修建全國鐵路，但係被守舊派批評會破壞祖墳，甚至破壞龍脈，令修建鐵路嘅過程中面對唔少困難。

原圖為唐胥鐵路。圖片嚟自網絡。