國共內戰期間，有三場相當重要嘅戰役，包括遼瀋戰役、淮海戰役、平津戰役，又稱「三大戰役」。呢三場戰役發生喺1948年9月至1949年1月期間，歷時142日，國民黨連輸三場，損失超過150萬兵員，最終撤至台灣。

淮海戰役於三場戰役中最為關鍵，蔣介石當時都提過，依場戰役係「國家存亡最大關鍵」。而共產黨方面，淮海戰役係解放軍於三場戰役當中傷亡最多，但同時係殲敵最多嘅戰役。呢場仗喺1948年11月6日開始，到1949年1月10日結束，解放軍有13.4萬人傷亡，而國民黨軍就有55.5萬人死亡或者被收編。共產黨喺呢場戰役中囊括長江以北華東同中原大部份地區，迫近國民黨南京同上海嘅統治中心。

當時參戰嘅國民黨將領有杜聿明及孫元良等，大家可能未聽過佢哋嘅名，不過兩人嘅下一代就廣為人知，杜聿明嗰女係諾貝爾獎得主楊振寧嘅第一任太太杜致禮，而孫元良個囝就係同林青霞有過一段戀情、主演過多套瓊瑤電影嘅演員秦漢。

原圖嚟自網絡。