話說响民國時期，「辮子將軍」張勳喺1917年7月初大搞復辟，迎溥儀復位，惹嚟一片反對聲浪。皖系軍閥段祺瑞好快就KO張勳，結束呢場鬧劇。但重新掌權出任國務總理嘅段祺瑞拒絕恢復《中華民國臨時約法》同召回國會，並主張武力統一政策。

喺7月中，對北洋軍閥甚為不滿嘅孫中山發表演說，提出要打倒「假共和」、建設「新共和」，呼籲各界護法。孫中山嘅號召最先得到北京政府海軍總長程璧光嘅響應，佢聯同第一艦隊司令林葆懌率軍艦南下，同行包括唐紹儀、汪精衛等人。桂系、滇系軍閥為咗自己利益，亦加入護法行列。孫中山號召舉行國會，得到超過150名國會議員響應南下，舉行「國會非常會議」，會上通過成立中華民國軍政府，以恢復《臨時約法》，並選舉孫中山為大元帥。

護法戰爭隨即爆發，護法軍獲得多場勝利，北京內部以馮國璋為首嘅直系軍閥同以段祺瑞為首嘅皖系軍閥之間嘅矛盾加劇，主和嘅直系軍隊喺戰事中採取消極態度，令北洋軍大敗，派佢哋出戰嘅段祺瑞因此引咎辭職。不過桂系同滇系軍閥分別控制湘、川兩省之後，滿足自己私利之後，就向直系議和，阻撓護法軍北伐，又拉攏國會內嘅政學會等政客排斥孫中山，最終導致護法運動失敗收場。

圖為孫中山任職大元帥。原圖嚟自網絡。