1997年回歸後，香港實行一國兩制，令資本主義制度得以繼續保持。講開一國兩制，又點可以唔提其中兩位重要人物——周恩來同鄧小平？今日一於先同大家講講周恩來同一國兩制嘅關係，以及一國兩制嘅最初構思。

一國兩制雖然於香港實行，但最初其實係為解決台灣問題而度身訂造嘅產物，最早嘅構想可以追溯返去五十年代中期。當時韓戰同越戰已經停火，兩岸緊張形勢亦有所緩和。1956年6月28日，時任總理周恩來响人大會議上提出，願意同台灣當局協商和平解放台灣嘅具體步驟同條件，希望台灣搵個合適時機，派代表到北京或者其他地方，齊齊慢慢傾，唔掂拆到掂。

去到1963年，周恩來括出「一綱四目」嘅主張，一綱係台灣必須回歸祖國，而四目包括台灣回歸後，除外交必須統一於中央外，所有軍政大權、人事安排等由蔣介石當局決定﹔台灣所有軍政同建設費用一旦不足，會由中央政府找數﹔台灣社會改革可以從緩，必須等條件成熟，並尊重蔣介石嘅意見，協商後先推行，以及雙方約定，唔會派特務同破壞對方團結。當時仲講明，只要台灣唔從中國分裂出去，大陸就唔改變當時對台關係。

睇到依度，係咪覺得有啲熟悉？無錯，當時雖然未有「一國兩制」依個講法，但係「一綱四目」就係希望响兩岸統一之下，各自嘅社會制度不變。1975年，蔣介石方面委託國民黨元老陳立夫，透過香港秘密渠道邀請毛澤東或周恩來訪問台灣，重啟談判。不過蔣介石同年4月逝世，而毛澤東及周恩來亦於1976年逝世，令件事未能成真。

原圖嚟自網絡。