之前同大家講過少少國歌嘅歷史，提到清朝同民國嘅幾首歌，今日繼續講埋下半截。相信部份史友都知道，《義勇軍進行曲》嘅出現係源於一套抗日電影，咁大家又知唔知，首歌嘅創作靈感同作者响碼頭見到軍火有關？

話說1934年創作人田漢帶埋個仔，同音樂人聶耳去咗上海外灘碼頭觀察工人的生活，想攞啲創作靈感。當時碼頭堆咗一個個箱，田漢一望，發現入面係日本用嚟攻打中國嘅軍火。佢哋後嚟根據依次經歷，創作出抗戰歌劇《揚子江暴風雨》，所唱嘅歌包括《義勇軍進行曲》嘅前身《前進歌》。

後嚟田漢於1935年為抗日主題電影《風雲兒女》嘅主題曲創作歌詞，最初啲歌詞只係寫响煙盒嘅錫箔紙上面。經過聶耳作曲、聽取《風雲兒女》導演嘅意見後，首歌加入三個「起來」、「前進！前進！進！」等歌詞，成為《義勇軍進行曲》。

去到1949年4月，共產黨派代表團到捷克，參與「保衛世界和平大會」。根據規定，開幕禮當日代表團入場時都要奏國歌，臨時臨急，去邊度搵首歌？佢哋最後決定搵《義勇軍進行曲》代替，不過有人提出抗日已經結束，「中華民族到了最危險的時候」句歌詞唔太適合，文人郭沫若提議改成「中國民族到了大翻身的時候」，令修改版代國歌首次於捷克响起。

同年9月，周恩來認為要用返原汁原味嘅歌詞，先至表達到中華民族於危難關頭勇往直前、不屈不饒精神。後嚟政協第一屆全體會議通過決議，列明《義勇軍進行曲》為國歌。

原圖嚟自網絡。