最近國歌嘅話題引起唔少人關注，一於搵返中國國歌嘅歷史同大家分享吓先。新中國嘅國歌係《義勇軍進行曲》，依個唔駛多講，咁清朝同民國又有無國歌？內容又講啲乜？

中國國歌嘅歷史最早可以追溯到清朝。話說响光緒年間（公元1896年），北洋大臣兼直隸總督李鴻章作為外交特使，到西歐同埋俄羅斯訪問。按當時外交慣例，歡迎儀式上要奏國歌，清廷就臨時改編唐朝詩人王建嘅七絕詩「金殿當頭紫閣重，仙人掌上玉芙蓉，太平天子朝天日，五色雲車駕六龍。」用嚟頂住檔先。唔駛問，李鴻章順理成章係最早用依首歌嘅人，所以首歌被稱為《李中堂樂》。

之後清廷對外交往同國內大典都用過依首歌，後嚟仲出現首軍歌《頌龍旗》，同樣都係國歌代替品。去到1911年，清政府正式頒布「國樂」《鞏金甌》：「鞏金甌，承天禱，民物欣鳧藻。喜同胞，清時幸遭。真熙嗥，帝國蒼穹保，天高高，海滔滔。」講到鞏固國土、清朝受上天庇佑，啲子民都好開心，完全係官方口吻。

依首由翻譯家嚴復作詞嘅文言文國歌有一大特點，就係夠深，真係好似會考讀書咁，搵本雞精書煲一煲先得。據講首歌仲有另一個名——《大清國雄踞列強萬萬年》，真係要寫個服字……唔知係咪先天不足，《鞏金甌》生存咗6日就極速「夭折」，因為辛亥革命爆發，首國歌自然同清廷一樣，成為歷史。

後嚟南京臨時政府嘅《五旗共和歌》、袁世凱政府嘅《中華雄據天地間》、段祺瑞政府嘅《卿雲歌》等，都曾經成為國歌。下次再同大家介紹《義勇軍進行曲》嘅歷史。

原圖嚟自網絡。