上年喺金像獎拎咗終身成就獎嘅楚原大放金句同正能量，仲講返當年佢同六嬸方逸華嘅恩怨，令觀眾留低深刻印象。唔少觀眾可能記得楚原做「歸齡高」、「如來佛祖」等幕前嘅精彩演出，其實佢周身刀張張利，編導演瓣瓣掂，一齊睇睇佢嘅威水史先。

楚原於廣州出世，原名張寶堅，爸爸係著名粵語片男星張活游。近年雖然較少機會可以喺幕前見到楚原，但佢喺90年代都參演過唔少TVB嘅劇集，例如《真情》、《大頭綠衣鬥殭屍》、《西遊記》、《陀槍師姐》系列等。阿史最有印象嘅，係佢飾演《殭屍福星》嘅殭屍爺爺，楚原本來係慈祥爺爺，點知變咗殭屍之後恐怖指數飆升，再配合埋音樂，每次出場都令人有心寒嘅感覺。

其實楚原唔止識做戲同拍戲，佢最初入行果陣仲係個編劇，筆名秦雨，喺50-80年代寫過唔少粵語電影劇本，例如《大丈夫日記》、《可憐天下父母心》等，仲改編過唔少武俠小說作品。不過，講到楚原最擅長嘅都係做導演。受爸爸影響，佢1956年已經加入粵語電影界。兩年後，24歲嘅楚原已經獨立執導《湖畔草》，再過多兩年就拍出叫好叫座嘅《可憐天下父母心》。

1973年，楚原為邵氏拍成首部諷刺時弊嘅粵語片《七十二家房客》，反映出香港社會嘅人生百態，呢部電影更刷新咗香港嘅票房紀錄，令一度消失嘅粵語片恢復製作。唔單止係咁，楚原仲開創咗改編古龍小說做電影嘅熱潮，唔少古龍嘅經典著作都被佢搬上大銀幕，例如《流星‧蝴蝶‧劍》、《楚留香》、《多情劍客無情劍》、《三少爺的劍》等。1979年，楚原更改編古龍嘅《武林外史》並拍成電影《孔雀王朝》，獲得亞洲電影節最佳動作片導演獎。

至於楚原同六嬸嘅恩怨，同埋楚原同佢太太嘅sweet嘢，留返下次再講。

原圖嚟自網絡。