喺上世紀20年代，中國發生咗轟動一時嘅劫案──臨城火車大劫案，案中有幾十名外國人被挾持，引起中外關注，更一度令北洋政府陷入外交危機。

話說响1923年，一班土匪自稱為「山東建國自治軍」，佢哋嘅首領名為孫美瑤。第一次直奉戰爭之後，班土匪被山東督軍圍剿，為咗擺脫困境，佢哋諗住策劃驚天大案嚟做「籌碼」：打劫一架開往天津嘅「藍鋼皮」列車。佢哋事先拆毀津浦線火車嘅一段路軌，當架列車駛到斷軌路段煞停之後，孫美瑤率領一眾同黨衝上車大肆搜掠，仲槍殺咗反抗嘅英國人Joseph。

車上乘客主要係中國上流人士同嚟自英美法意等外國人，據講包括袁世凱女婿以及美國著名嘅洛克菲勒家族成員。眼見有人被殺，其他人又點敢亂嚟？班土匪挾持39個外國人同30個中國人做人質，仲威脅會撕票。單案涉及多國乘客同埋有身份地位嘅人士，引起中外轟動，外國公使團向北洋政府施壓，要求於限期前營救人質，以及就事件負責，即係賠錢。

當時北洋政府同孫美瑤談判，經過多輪拉鋸，雙方作出「交易」：全部人質先後獲釋，一眾土匪獲得收編，而孫美瑤就成為旅長，令擾攘一個多月嘅驚天劫案暫告一段落。不過，人哋又點會咁易放過孫美瑤呢？無幾耐，孫美瑤就被指嘩變，喺一場「鴻門宴」上被拉到牆邊斬頭，身首異處。

圖為土匪與外國人質合照，以及列車上嘅外國乘客。原圖取自網絡。