講到歷史上出名嘅漢奸，張敬堯都可以話係當中嘅佼佼者，數一數二牆頭草嘅代表。

張敬堯係安徽潁州人，後生果陣已經唔學好，走咗去做盜賊，後尾仲做埋殺人犯，潛逃去京津，之後加入埋由當時仲係清朝內閣總理大臣嘅袁世凱所新組建嘅陸軍。1913年二次革命期間，張敬堯因為喺江西省擊敗革命軍立功，無幾耐就升咗做陸軍第6師第11旅旅長兼南昌衛戌司令。之後，張敬堯屢立軍功，節節高升。但係，隨住1915年袁世凱因為稱帝而惹起國內大片反對聲音後，作為袁世凱麾下猛將之一嘅張敬堯隨即亦被護國軍擊潰。

袁世凱去世後，張敬堯先後投靠過皖系軍閥段祺瑞、奉系張作霖、直系吳佩孚、奉系張宗昌。但係，張敬堯每次效命嘅時間都唔長，一來佢領軍作風令軍紀敗壞，經常縱容手下壓榨、欺凌百姓，為百姓所不齒；二來，張敬堯份人並唔頑強，一旦戰敗，隨即就會轉投其他軍閥勢力。直到1931年「九一八事變」，日本佔領東北三省並成立偽滿州國，翌年張敬堯就又轉投偽滿政府，成為當時日本軍國主義嘅幫凶，期間積極配合日本軍方喺華北地區招募人手組織偽滿政權。1933年，張敬堯秘密潛入北平，組織舊部下，準備喺華北發動政變，令到日軍可以趁機吞併當地。

當時喺北平嘅國民政府軍事委員會代理委員長何應欽得到消息之後，即刻上報蔣介石成立嘅軍統。蔣介石得悉事件後，隨即下令特工阿頭戴笠殺一儆百，就係咁，張敬堯成為軍統刺殺嘅第一個目標。1933年5月，張敬堯喺北平六國飯店遇刺身亡。

圖為張敬堯同六國飯店，原圖嚟自網絡。