大年初二，各位恭喜發財！要咩有咩！今日各家各戶嘅媽媽級人馬紛紛出動，準備餐好意頭嘅餸菜，同屋企人食返餐好。作為奀皮嘅小朋友，細個新年肯定都有聽過「再曳就同你開年」等類似金句，唔知大家又有無諗過，點解開年唔係年初一？點解被打會同「開年」有關呢？

傳統上年初一唔會殺生，多數食齋，所以大家去到年初二先可以放開懷抱飲飲食食。農曆新年大家有假放，連神明都唔例外，據講年三十同初一係佢哋嘅假期，所以年初二拜神同食開年飯，係為咗迎接初二「開工」嘅諸位神仙。開年飯通常會食啲好意頭菜式，好似雞、生菜蠔豉咁，應一應節。

至於另一種「開年」，係利用年初二首度殺生嘅意思，用嚟形容新年期間小朋友一曳就會捱打，令到父母新一年要「破戒」動手咁解。唔想被大人開年？好簡單，乖乖哋咪得囉。

原圖嚟自網絡。