上次講開雞記創辦人「阿雞」早年中咗馬票，佢用筆彩金開咗間士多，慢慢將士多變成麻雀檔。今次不如就講下咩係「馬票」。

「馬票」（粵音讀：「馬標」）係香港早年一種結合抽獎同賽馬嘅博彩方式，個玩法就係响售出嘅馬票入面，用攪珠方式抽出入圍號碼，之後將號碼編配俾一批馬匹，嗰批馬之後就喺馬票賽事中出賽，跑第一嗰匹馬嘅相應號碼就係頭獎彩票號碼，跑第二嗰匹就係二獎、跑第三就三獎，其餘入唔到頭三名嘅「入圍號碼」都會有獎分。

戰後嘅馬票買兩蚊一張，响當時嚟講可以話係中產玩意，所以市民有時會夾份買。雖然馬票本身唔平，但獎金吸引，頭獎獎金由幾十萬去到成百萬不等，馬會資料話喺50年代，過百萬足足夠買幾十層洋樓，所以馬票每次開獎都非常觸目。直至60年代，馬會增設唔同種類嘅賽馬博彩，再加上喺1976年推出六合彩，導致馬票式微，最終喺1977年停辦馬票。

圖片為1972年馬票，取自網絡。