農曆新年有假放，又可以見一見班親朋戚友，食吓啲賀年食品咁，真係正！有得放假自然爽，不過原來民國有一段時間禁止大眾慶祝農曆新年，連講句恭喜發財都隨時惹禍上身。究竟當時發生咩事？

首先講講點解會出現兩個新年，話說1912年孫中山就任臨時大總統，並向全國公告改用西曆，將1月1號稱為「新年」，標示改朝換代同埋向封建帝制講拜拜。不過民間慣咗用農曆，一時好難改變，就繼續將農曆正月初一當做傳統新年，後嚟袁世凱上台之後，就將農曆正月初一改稱為春節，1月1號就係元旦新年。

去到1928年底東北易幟，中國統一，政府1929年規定全部人都要過1月1日嘅元旦新年，禁止慶祝農曆新年，貼揮春、點煙花爆仗等活動全部無得留低，商販如果賣門神，會被撕走；舞龍舞獅嘅就仲麻煩，隨時監都有得坐。咁唔慶祝，講句「恭喜發財」得喇掛？唔好意思，講完會被視為「反動派」，手尾長。去到1930年政府更加嚴格，農曆新年期間商販一旦閂門休息，當局會派人逼佢開鋪做生意。

咁搞法，幾時先至可以慶祝農曆新年？後嚟政府發現「佢有佢禁」，大家依然偷偷地過等等原因，大概去到1934年，就無再阻止大家慶祝農曆新年，於是啲爆仗、花鼓等過年物品全部出返曬嚟，齊齊歡度節慶。

原圖嚟自網絡。