唔知大家有無聽過「成也蕭何，敗也蕭何」呢個成語？講嘅係蕭何同韓信兩位漢朝名臣名將，不過阿史今日唔係想講依兩位漢初三傑嘅故事，而係漢朝開國君主劉邦將蕭何比喻為獵人嘅故事。

蕭何自從劉邦仲係一介布衣果陣已經多次相助，等到劉邦做咗沛公，蕭何更加隨侍左右。後嚟劉邦同西楚霸王項羽爭天下，都係蕭何勸阻劉邦千其唔好衝動去攻打勢頭正盛嘅項羽，暫時留喺漢中為王，等之後收用巴蜀嘅財力、平定三秦就可以同項羽一爭。劉邦聽取蕭何嘅建議，仲封佢為丞相。蕭何上任之後，幫劉邦治理櫟陽，制定法令規條，建立宗廟、宮室等，持續供應軍糧俾前線軍隊，又極力舉薦猛將韓信，對劉邦日後建立漢朝起咗重要作用。

根據司馬遷《史記．蕭相國世家》記載，劉邦做咗皇帝之後論功行賞，以蕭何功勞最大，封為酇（音讚）侯。底下一班大臣對此好不滿，同劉邦抱怨話佢哋親身上戰場，用條命嚟打生打死，點解功勞都唔及蕭何一介書生？蕭何齋揸住支筆寫幾隻字，用口講幾句，功勞地位都喺佢哋之上，咁公平咩？劉邦就問佢哋「知獵乎」，然後就解釋話獵人打獵嘅時候，追殺獵物嘅係獵犬，而發號司令嘅係獵人，宜家在座各位嘅功勞就好似獵犬咁，而蕭何嘅功勞等同獵人一樣。而且各位只係自己一個或者兩三個屋企人嚟追隨我，但蕭何全族成幾十人都跟隨我，咁嘅功勞點可以忘記！劉邦幾句說話即刻窒到一班大臣唔敢出聲。諗諗吓，班功臣被劉邦比喻做狗狗，真係……

原圖嚟自網絡。