年廿八自然要洗邋遢，大家有無買定碌柚葉清潔同沖涼？雖然近年出現碌柚葉沐浴露等產品好方便，不過阿史覺得煲過嘅碌柚葉水先至最正宗，不如講講點解要用碌柚葉沖涼，等大家參考吓。

洗邋遢嘅原意係消病除災，據講「塵」同「陳」同音，所以洗邋遢寓意洗去陳舊，好好迎接新一年。舊時啲人年廿六或者廿七前還神，去到年廿八就執屋過年，經過多年就變成習俗。仲有講法話，揀年廿八係同諧音「易發」有關，有邊個唔想發達？其實唔一定要年廿八洗邋遢嘅，只要過年前搞掂就無問題喇。

至於碌柚葉備受尊崇嘅「地位」，係同一個傳說有關。話說好多年前有條村瘟疫肆虐，有個唔知村民定大夫搵碌柚葉沖涼，之後神奇地好翻曬，其他村民自然照跟，成條村先至可以KO瘟疫，亦因為咁，此後碌柚葉就被認定係驅邪驅病嘅正嘢。另外有講法話碌柚代表吉祥，加上「柚」同「佑」嘅讀音近似，所以用碌柚葉沖涼可以保佑平安，擊退邪氣。除咗年廿八，部份人會「年廿九洗碌柚」，聽日先出動碌柚葉，唔知大家有無用佢呢？。

原圖嚟自網絡。