大家新年打開個全盒未？通常入面都會放啲好意頭嘅嘢食，好似煎堆、糖冬瓜、瓜子，以及各式各樣嘅糖果等等，食咗咁多年，大家又知唔知佢哋有咩寓意？

瓜子係新年全盒嘅主角之一，寓意係抓銀，代表賺取財富嘅意思，大家從全盒抓一大把瓜子嘅動作，係咪好似抓銀咁款呢？瓜子仲還有呱呱落地嘅寓意，想子孫滿堂？新年食多兩粒喇喂。

香口嘢好多人中意，過年又點少得？「煎堆轆轆，金銀滿屋」，話說屈大均嘅《廣東新語》提到「煎堆者，以糯粉為大小圓，入油煎之，以祭祀祖先及饋親友者也。」可以證明煎堆嘅悠久歷史。而煎堆嘅「朋友」油角，外形似元寶，加上諧音「有角」，代表跟住嗰年可以出人頭地，嶄露頭角。

全盒嘅食品講意頭，部份騎呢糖果味道好唔好就見仁見智喇，阿史最唔like就係糖冬瓜，太甜，同啪粒方糖無分別。不過糖冬瓜代表好頭好尾，咗生意嘅朋友要食返條喇。除咗糖冬瓜，代表三代同堂、有爺有子嘅糖椰絲，以及寓意連生貴子嘅糖蓮子，都係全盒「常客」。

全盒又點止咁少花款？象徵開口笑嘅笑口棗、步步高升嘅年糕等，真係諗起都想食。過年咁多正嘢，大家食還食，唔好太放縱呀。

原圖嚟自網絡。