近排無綫播清宮劇《如懿傳》，同啲朋友提到康熙同乾隆分別做咗六十年或以上嘅皇帝，認真「長命」。講開皇帝之最，不得不提在位時間超短嘅皇帝——金末帝完顏承麟。有幾短？短到分分鐘連張龍椅都未坐熱。

根據《金史》記載，完顏承麟嘅上手，即係金哀宗當時被蒙古軍隊追趕，佢唔想做亡國君主，所以响蔡州傳位畀將領完顏承麟，完顏承麟一開始無答應到，不過哀宗話自己「以肌體肥重，不便鞍馬馳突」，簡單而言就係話自己肥得滯，好難策馬馳騁，仲話完顏承麟身手敏捷，可以走得快好世界，一旦保得住條命仔，金代嘅國祚先有望延續。

哀宗講到咁，完顏承麟唯有答應。公元1234年正月，完顏承麟於蔡州匆匆忙忙登基，當時宋、蒙大軍已經殺到去宮門口，佢一完成典禮、做咗皇帝就領軍抵抗，同敵方展開巷戰。而哀宗聽到四面撼動天地嘅交戰聲，選擇自縊身亡，完顏承麟知道哀宗嘅消息後，率領群臣喊餐飽，都仲未喊完，城破國亡，完顏承麟最後為亂兵所殺。據講金朝依位末代皇帝，在位時間唔夠一個時辰，即係兩粒鐘都無。

原圖嚟自網絡。