過年聽過最有志氣嘅其中一句話，係女性同樣可以撐起半邊天。中國歷史之中，不乏女性嘅參與同貢獻，好似武則天咁，成為中國嘅女皇帝，絕對係一個傳奇。講開又講，大家知唔知歷史上仲有無其他女皇帝？

翻看北魏歷史，孝明帝元詡年幼即位，被媽媽胡太后把持朝政，隨住時間推移，孝明帝慢慢大個，開始對胡太后感到不滿。公元528年，孝明帝逝世，相傳係被胡太后狠心毒殺。皇帝瓜咗，胡太后就扶植孝明帝唯一嘅骨肉、唔夠兩個月大嘅BB元氏為帝，沿用孝明帝嘅武泰為年號。

不過又有邊嘅估到，全部竟然係胡太后嘅精心設計嘅騙局？《魏書》同《資治通鑒》記載，原來胡太后呃班大臣話元氏係男仔，幾日後見大局已定，先自爆話元氏其實係B女，仲改立臨洮王嗰仔、幾歲嘅世子元釗為幼主，繼續把持朝政。

歷史對女皇帝元氏嘅著墨並唔多，大家甚至連佢叫咩名都唔知。大部份史書無將元氏納入正統帝系，加上佢只係胡太后嘅傀儡同工具，所以唔少史學家都認為武則天先係中國第一位女皇帝，不過亦有學者認為，元氏係第一個登上皇帝寶座嘅女性，早過武則天百幾年，現代史學家翦伯贊於《中國史綱要》入面，稱呼元氏為「中國第一個女皇帝」，大家又點睇？

原圖嚟自網絡。