有親戚新年去咗轉澳門，食自助餐食到飽一飽，仲話下次叫埋大家齊齊去。提到澳門，唔少史友都知道同佢有梳打埠、馬交、濠江等別名，不過大家又知唔知佢原本叫咩名？

話說16世紀中葉葡萄牙人仲未去到之前，澳門其實係一條小漁村，原本叫做濠鏡或濠鏡澳。點解咁叫？當時澳門一帶盛產蠔，而蠔殼內壁光亮如鏡，同澳門嘅地形相似，因此稱為蠔鏡。至於嗰「澳」字，就係當時泊船口岸嘅叫法。蠔鏡蠔鏡叫得多，之後啲人就改做文雅啲嘅「濠鏡」。清朝乾隆年間嘅《澳門紀略》提到，濠鏡嗰名响《明史》已經出現，仲講到濠鏡有「南北二灣，規圓如鏡，故曰濠鏡」，大家熟悉嘅濠江，都係响依個名度引申出嚟。

至於澳門嘅英文Macau，就係同葡萄牙人有關。第一批葡萄牙人去到澳門時，自不然會問問居民嗰度叫咩名。點知啲居民以為班外國人講緊間廟，就答「媽閣」，葡萄牙人就音譯成大家好熟悉嘅Macau。

原圖來源：Dennis G. Crow Ltd.