貓貓咁得意，唔少人都爭住做貓奴，不過中國歷史上嘅女皇帝武則天就好驚貓，究竟貓貓因咩原因「得罪」佢？據《舊唐書•後妃傳》記載，唐高宗李治於公元655年將王皇后同蕭淑妃廢為庶人，罪名係「陰謀下毒」詛咒當時係武昭儀嘅武則天，兩人仲被囚禁別院。蕭淑妃當時大鬧武則天，仲詛咒佢變成老鼠，而自己做貓，生生世世都要扼斷武則天嘅喉嚨。武則天好嬲，又驚個詛咒會靈驗，從此以後宮中禁止養貓。

去到692年，根據《朝野僉載》記載，武則天有日係度玩貓同鸚鵡，特登話俾人知，蕭淑妃就算化身為貓都無有怕，睇吓佢宜家咪幾溫純，可以同鸚鵡和平共處。話口未完，唔知係咪隻貓食唔飽，轉過頭就咬死咗隻鸚鵡食埋。鸚鵡個「鵡」同武則天個「武」同音，鸚鵡被咬死係不詳之兆，武則天覺得好有可能係蕭淑妃死後多年依然陰魂不散，對貓仲係心有餘悸。

原圖嚟自網絡。