一至五晚晚播《皓鑭傳》，男主角唔單止有秦始皇爸爸異人，仲有好出名嘅商人呂不韋。除咗奇貨可居之外，成語一字千金同樣與呂不韋有關。

話說當年呂不韋見到魏國信陵君、楚國春申君、趙國平原君、齊國孟嘗君等門下食客眾多，梗係唔執輸，養返一批食客，最高峰時期擁有食客三千。後嚟呂不韋叫啲食客搞個大project——編寫巨著。當時唔似依家咁資訊流通，啲食客要搜集資料再編寫，最後寫咗超過二十萬字出嚟，分為八覽、六論、十二紀，共計二十六卷，記載歷史、地理、傳記等內容，書名為《呂氏春秋》。

《呂氏春秋》記載嘅嘢好雜，當中有唔少金句，好似「察己可以知人，察古可以知今」、「欲勝人者必先自勝」等，都係出自依本書。用咁多人力物力整本《呂氏春秋》，點可以收收埋埋？成書之後，呂不韋响咸陽畀本著作大家睇，仲好串嘴咁話，邊個可以增加或刪減一隻字，就可以獲得千金。自此，呂不韋同《呂氏春秋》為人所熟知。

原圖嚟自網絡。