早前講開武則天、北魏元姑娘等歷史傳奇女性，今日再同大家講多個——戰國時期齊國君王后。話說佢做女嗰陣已經好有慧眼，睇中咗落魄嘅田法章，亦即係後嚟嘅齊襄王。不過要數君王后最霸氣一面，肯定係佢用計仔KO秦國刁難，保住齊國面子。

先講返君王后同齊襄王嘅相遇先，話說齊襄王當年未繼位，一度落難去咗太史敫屋企打工。而君王后係太史嗰女，嗰時覺得田法章絕非平凡人，於是成日私底下接濟佢，仲私定終身。後嚟田法章被迎為襄王，嚟個大翻身，太史女就成為君王后。不過太史就好唔滿意，覺得佢哋自把自為，所以同個女斷絕關係，一世都唔見佢。

雖然係咁，君王后依然穩坐后位，仲生咗囝囝田建。襄王逝世後，田建成為齊王，君王后就成為太后。《戰國策》記載，秦王有次派人挑機，送咗一組玉連環，即係扣埋一齊嘅玉環畀齊國，仲串嘴咁話，聽聞有好多齊國奇人異士，有邊位得開個玉連環？君王后命成班大臣傳閱，點知個個大臣對住嚿嘢都滿腦黑人問號。君王后忍唔住，叫人搵把鎚嚟，親手扑碎咗嗰玉連環，「咁就拆解到喇」。阿史對於依幕只可以用四個字形容：霸氣側漏。

原圖嚟自網絡。