阿史媽媽近排開始煲之前紅遍內地嘅《羋月傳》，裡面講到南后鄭袖為咗爭寵，設計陷害魏美人，屈佢嫌棄楚懷王嘅異味，搞到魏美人被割鼻。唔好以為呢個情節只係會喺電視劇出現，歷史上係真有其事。

鄭袖係戰國時期楚懷王嘅寵姬，亦有說法話鄭袖同南后其實係同一個人。根據《戰國策·楚策》記載，魏王獻咗位美人俾楚懷王，呢位魏姬深得楚懷王寵愛，令原本盛寵嘅鄭袖備受冷落。鄭袖就犀利囉，唔單止唔妒忌，仲對魏姬超好，衣物首飾等全部都按魏姬喜好嚟準備，簡直可以話係對魏姬仲好過對楚懷王。搞到楚懷王都信鄭袖一啲都唔妒忌魏姬，至於魏姬，直情以為鄭袖真係當正自己係親姐妹咁，對佢言聽計從。

好戲就嚟喇，鄭袖博取咗楚懷王同魏姬嘅信任之後，就同魏姬講：懷王好鍾意你嘅美貌，但係呢，佢就覺得你個鼻生得唔好。所以你下次見王果陣，可以遮住自己個鼻，費事懷王見到唔開胃。魏姬對呢位好姐妹信到十足十，於是一見到楚懷王就用手捂住個鼻。久而久之，楚懷王積咗滿頭嘅黑人問號，就問鄭袖，點解魏姬見親自己都要掩住鼻哥。鄭袖之前做嘅所有嘢就係為咗等呢一刻，佢笑笑口咁答：魏姬咁做之唔係因為佢嫌棄你身上果陣臭味囉。楚懷王果然大怒，立即傳令割咗魏姬個鼻。魏姬無咗個靚樣，自然就唔可以再同鄭袖爭寵喇。呢招借刀殺人，鄭袖做得乾淨俐落，果然係最毒婦人心。

圖為《羋月傳》嘅鄭袖，原圖嚟自網絡。