一場大火，奪去無數生命。1938年10月，日本侵佔咗湖北武漢之後繼續向南邊進攻，直逼湖南岳陽，長沙備受威脅。當時國民黨嘅最高話事人蔣介石抵達長沙之後，汲取咗之前喺武漢未能及時實行「焦土抗戰、堅壁清野」嘅方針，導致武漢嘅交通、水電等物資被日軍佔用，於是決定焚毀長沙，阻止日軍前進。

同年11月12日，岳陽失守，湖南省主席張治中指定國民黨警備第二團團長徐昆為總指揮，並由長沙警察局局長文重孚組織行動。點知當晚縱火隊將士兵烤火誤當成係放火嘅訊號，隨即喺全城各處點火，無幾耐長沙迅速變成火海，大火足足燒咗3日3夜，燒毀房屋5萬幾棟，燒死居民2萬幾人，全城十之八九設施、建築物被焚毀。

火災令長沙大部份居民痛失家人、財產，一夜之間成為災民，舉國震驚，各地人民要求嚴查縱火元兇。蔣介石為咗平息民憤，組織高等軍事法庭會審，嚴懲肇事者，最後長沙警備司令酆悌、徐昆同文重孚被判處死刑。張治中自知無法逃脫罪責，主動提出請求處分，蔣介石命佢革職留任。

圖為大火之後嘅長沙街景，原圖嚟自網路。