之前講咗唔少民國時期歷史，有史友認為用中國兩字去形容當時並唔正確，搞到阿史搲爆頭諗咗好耐，今日一於同大家研究華夏政權幾時出現同使用中國嘅稱呼。

古代對中國有多種定義同用法，例如用嚟形容天子居住嘅京師，或者形容中原地區等。西周曾經有青銅器銘文鑄有中國兩隻字，到公元前221年，秦始皇滅六國一統中原，《史記·天官書》記載「其後秦遂以兵滅六國，並中國。」自秦漢起，中國多數用嚟形容統一、中央王朝。

明太祖朱元璋建立明朝之後，派人帶埋詔書去其他國家，佢行文中多次用中國嚟稱呼明朝政權，好似畀高麗嘅詔書提到自己「肅清華夏，復我中國之舊疆」、畀日本嘅詔書提到「自去歲以來，殄絕北夷，以主中國」、「帝王居中國而治四夷」等。去到1596年嘅萬曆年間，明神宗曾經寫過封詔書畀日本嘅豐臣秀吉，話要冊封佢做國王，入面提到「崛起海邦，知尊中國」，收到封嘢之後豐臣秀吉激到彈起。而太監鄭和最後一次下西洋後，鞏珍編寫《西洋番國志》講述經過，以至記載傳教士事跡嘅《利瑪竇中國札記》，都將明朝稱為中國。

去到清朝，1689年簽訂嘅《尼布楚條約》中，一開頭就用「中國大皇帝欽差」嚟形容索額圖。至於1842年嘅《南京條約》中，同時使用中國同大清，分別用嚟形容國家同政府。而晚晴時期，孫中山於《同盟會革命方略》入面闡述驅除韃虜、恢復中華嘅思想，已經提到中國，「中國之政治，中國人任之」。1911年辛亥革命推翻滿清，建立中華民國，後嚟孫中山臨終前簽署嘅《國事遺囑》，道出自己「致力國民革命，凡四十年，其目的在求中國之自由平等」，可見中國一詞，自古至今都不斷使用，並唔係1949年之後先開始出現。講咗咁耐，唔知大家又點睇？

原圖嚟自網絡。