唔知大家有無見過相思樹？原來相思樹係來自一個淒美嘅愛情故事。據《搜神傳》入面記載，戰國時期宋康王嘅臣子韓憑，有位年輕貌美嘅妻子何氏，點知不幸被宋康睇中，夾硬搶咗入宮。韓憑嬲爆，憎死宋康王，於是宋康王就叫佢去做苦力築城。何氏被擄入宮中，思念丈夫，就偷偷命人送咗封信俾韓憑，上面寫住：「其雨淫淫，河大水深，日出當心。」後嚟宋康王都得到呢封信，但睇嚟睇去都唔知佢講乜。只係得大臣蘇賀識解，話何氏呢封信形容自己因為同丈夫分開而發愁，嗰心好似落雨咁款，而河水係比喻兩夫婦自此之後無法相見，唯有以死明志。而韓憑見到妻子嘅信之後，居然先一步自殺而亡。

至於何氏，喺宋康王帶佢登上高台遊玩嘅時候，跳落高台自盡，當場跌死。何氏留低咗封遺書，上面寫著佢想同夫君韓憑合葬。宋康王梗係唔俾何氏如願，仲要將兩人嘅墳墓隔到遠一遠，話：既然你哋咁恩愛，咁就自己諗辦法將墳墓合埋一齊，如果真係可以做到我都唔阻止。

傳說响一夜之間，呢對苦命鴛鴦嘅墳頭生出兩棵大梓樹，地下嘅根喺地底相匯，而地上嘅樹枝俯身相就，喺地面相連。樹上面仲有一對鴛鴦，一直棲息喺兩棵樹上，交頸悲鳴。當時宋國嘅人見到呢對鴛鴦，就諗起韓憑夫婦嘅淒美故事，於是將呢種樹叫做「相思樹」。

原圖嚟自網絡。