講起明朝咁多位皇帝、親王裡面，唔少人嘅下場都令人印象深刻，包括明神宗個仔、福王朱常洵，據講佢被煮咗嚟食，真係聽到都驚。

朱常洵係鄭貴妃所生，雖然明神宗寵愛佢哋兩母子，可惜朱常洵唔係嫡出又唔係長子，根據當年明太祖朱元璋定落嚟嘅「有嫡立嫡，無嫡立長」傳位規矩，朱常洵好似同皇位無咩緣份。不過為咗將朱常洵推上太子寶座，明神宗唔顧一眾大臣、太后反對，堅持廢長立幼，仲為此唔上早朝，罷黜咗唔少官員，史稱「國本之爭」。最後神宗讓步，封咗朱常洵做福王。後嚟朱常洵喺洛陽就藩，每日剩係沉迷喺酒色之中，出面起義、大旱、蝗災，佢通通都唔理。

1640年明思宗年間，闖王李自成打到去洛陽，朱常洵搵錢請咗班勇士嚟保護自己，點知都係敵唔過李自成嘅大軍。《明史·卷三百九·列傳第一百九十七》同《明史紀事本末·卷七十八》提到，朱常洵被李自成軍隊連埋啲鹿肉一齊剁成醬食咗，美其名曰「福祿酒」。唔少明清野史、筆記更加將朱常洵點樣被剃晒啲毛、灌腸，再擺落放滿調味料嘅高湯入面煮熟，而朱常洵點樣掙扎、反抗嘅過程描述到若有其事咁。不過，同係《明史》，第一百二十卷就話朱常洵雖然無命，但就無被人食，有兩個下屬搵咗副棺木嚟葬咗佢，留有全屍。

圖為朱常洵、李自成劇照，原圖嚟自網絡。