講起唐朝嘅公主，除咗舊年煒哥飾演嘅太平公主令人印象深刻之外，仲有一位作風大膽嘅公主，不過佢最後嘅下場比太平公主更慘，依位就係唐太宗嘅女高陽公主。

據《新唐書》記載，高陽公主本身有駙馬房遺愛，老公係宰相房玄齡第二個仔。高陽公主恃住唐太宗寵愛，個性驕縱任性，房玄齡逝世之後，公主想大伯房遺直將個爵位讓俾房遺愛，房遺直怕咗公主，同唐太宗講要讓位俾細佬。唐太宗唔俾，仲鬧咗公主一餐，自此高陽公主就開始對房遺直懷恨在心。

其實高陽公主同房遺愛本嚟就係政治婚姻，兩個人根本無感情，公主仲成日同和尚辯機私通。唐太宗得知呢件事之後梗係嬲到震，一怒之下斬咗辯機和尚之餘，仲殺咗公主身邊幾十個奴婢。高陽公主痛失所愛，自此對爸爸好唔滿意，就連唐太宗駕崩果陣都無半分愁容。

唐太宗死後，高陽公主更加「無王管」，除咗比以前更荒誕，同和尚、道士私通之外，仲諗咗條「好橋」報復房遺直。高陽公主同唐高宗李治講房遺直非禮佢，諗住整死對方。點知徹查件事嘅顧命大臣長孫無忌視房家為眼中釘，佢接手之後，非禮案即刻升級做謀反案。結果，自編自導自演非禮案嘅高陽公主惹嚟殺身之禍，仲害死埋駙馬同一大班朝中大臣，反而房遺直因為有阿爸嘅功勞加持，避過一死。

圖為《武則天》嘅高陽公主，原圖嚟自網絡。