「平生不識陳近南，便稱英雄也枉然！」金庸筆下嘅陳近南，响《鹿鼎記》入面係天地會總舵主，主力反清復明，武功仲好鬼勁添。歷史上，陳近南嘅原型陳永華係鄭成功嘅智囊軍師，仲被喻為當世「臥龍先生」，對台灣有唔少貢獻。

上次提到將領鄭成功想反清復明，而陳永華就係佢嘅謀士。陳永華本身係福建人，爸爸係一個舉人。陳永華十幾歲嘅時候得到兵部侍郎推薦，投靠鄭成功。鄭成功同陳永華「面試」嗰時，傾天下大事傾咗成日，覺得陳永華見解獨到，就稱讚佢係「臥龍先生」，仲畀埋個參軍佢做。

當時鄭成功諗住北伐，攻打南京，不過幕僚同將領之間嘅意見都唔一樣，真係頭都大埋，最後陳永華調解話一旦苟且偷安，好快就會被KO，令鄭成功同其他同僚都心服口服，聽曬佢講。後嚟鄭成功1661年同侵佔台灣嘅荷蘭人開戰，就叫陳永華同馮錫范等人跟住大仔鄭經，看住廈門同金門嘅地盤。1662年鄭成功收復台灣無幾耐之後逝世，鄭經响陳永華嘅輔助之下，輾轉繼位。

《清史稿》記載，陳永華幫鄭經制定法律同職官，興辦學校，設立考試制度，令台灣有所發展。陳永華指揮士兵屯田，仲將士兵嘅家屬帶埋去台灣，等大家團團圓圓之外，又可以增加生產力。1673年，鄭經反攻福建，陳永華留守台灣，繼續發展當地，好似教當地人煮糖曬鹽、燒磚等。

後嚟陳永華受到同僚排擠，辭職隱居，四十幾歲就英年早逝。清朝翰林學士李光地同康熙講，話台灣之亂咁長時間都未搞掂，正正就係因為陳永華經營有方。台南依家留低廟宇永華宮同衣冠塚，用嚟紀念依位對台灣發展扮演住重要角色嘅傳奇人物。

原圖為永華宮及劇照，取自網絡。