之前講開漢高祖劉邦點樣一步步由平民做到皇帝，今日繼續講吓劉邦為咗鞏固劉氏政權，究竟仲做咗啲乜嘢。話說劉邦打敗西楚霸王項羽，統一咗天下做咗漢高祖之後，梗係要嘉獎啲搏命打天下嘅下屬，陸續封咗唔少異姓王，好似楚王韓信、淮南王英布、梁王彭越等。其實皇帝心都係海底針，呢啲分封都係權宜之計，劉邦根本就信唔過呢班異姓王，於是來一招過橋抽板，韓信、英布、彭越等一個個被扣上謀反罪處死。

異姓王殺嘅殺、貶嘅貶，幾乎所剩無幾，劉邦都係唔放心，尤其係見到正室呂后嘅勢力慢慢坐大，就更加擔心。劉邦於是召來諸位同姓王一齊殺白馬飲血，立下「非劉氏而王者，天下共擊之，若無功上所不置而侯者，天下共誅之」嘅誓盟，希望自己百年之後，江山依然係劉氏天下。不得不提，呢個盟誓於劉邦死後繼續發揮影響力，呂后大封呂姓諸侯時，部份臣子都明白到呂氏咁做並唔「合法」。呂后過身之後，帝位依然掌握於劉氏手中。

圖為《楚漢驕雄》宣傳照，原圖嚟自網絡。