唔知大家有無睇過十幾年前TVB拍嘅《洛神》？入面郭羨妮飾演嘅郭女王既攻心計又狠毒，害死甄宓，令曹植同甄宓呢對天作之合陰陽相隔。咁究竟歷史上嘅郭女王係咪都係心狠手辣嘅人呢？答案竟然係出乎意料咁賢惠。

未講個人之前，講講佢個名先，點解郭女王會有個咁霸氣嘅名？據《三國志•魏書》所載，郭女王出世嘅時候天降異象，佢阿爸就話「此乃吾女中王也」，於是有咗呢個名。唔知係咪因為有呢個名加持，郭女王嘅一生認真傳奇，雖然早年父母雙亡搞到要顛沛流離，去咗銅鞮侯屋企做妹仔，不過後嚟嘅人生都相當順遂。郭女王先係順利入咗東宮，成為魏王曹操大仔曹丕嘅賢內助，處處為曹丕出謀劃策，助佢成功登上太子之位。曹丕非常寵愛郭女王，做咗皇帝之後，力排眾議都要堅持冊封郭女王做皇后，咁睇嚟郭女王嘅魅力真係唔惹小。

郭女王母儀天下之後，超賢淑又慳家，管理到成個後宮貼貼服服。郭女王無子，甄夫人個仔曹叡後嚟過繼俾郭女王所養，兩個人居然相處得好好，簡直係後世母慈子孝嘅典範。不過，睇返《資治通鑒》就話甄夫人嘅死係郭女王間接造成，當時曹丕啱啱即位，極寵郭女王，冷落咗甄夫人，令甄夫人頗多怨言。郭女王仲喺曹丕面前加鹽加醋，搞到曹丕一怒之下賜死甄夫人。而《漢晉春秋》講到仲誇張，話甄夫人死狀慘烈，披頭散髮之餘仲要被糟糠塞口，曹叡知道生母慘死嘅真相之後，亦都如法咁炮製郭女王，令郭女王不得好死。

圖為《洛神》劇照，原圖嚟自網絡。