近年流行一啲關於高智商兒童或者擁有異常特技嘅天才類綜藝節目，例如America's Got Talent、《最強大腦》等等，睇到大家歎為觀止。其實古代都有唔少天才兒童，好似戰國就有個12歲嘅神童甘羅，佢年紀小小，口才同膽識就比好多大臣都叻得多，識得無本生利，幫秦國賺咗16座城池，究竟佢係點做到嘅？

甘羅係秦國名将甘茂個孫，佢完全遺傳咗甘茂嘅聰明才智，據說佢三歲就可以將《論語》、《孟子》、《莊子》倒背如流，《詩經》、《楚辭》等更加係順手拈來。主張奇貨可居嘅商人呂不韋梗唔會放過甘羅呢個神童，一早就將佢收歸門下。甘羅12歲嘅時候，燕國送咗太子去秦國做質子，秦國爲咗表示結盟嘅誠意，亦諗住派大臣張唐去燕國。點知張唐曾經同趙國結怨，而要去燕國就一定要經過趙國，所以張唐勁淆底唔想去，就連呂不韋親自上門拜訪都勸唔掂。甘羅於是自告奮勇走去勸張唐，講起當初秦相范雎殺死唔服從命令嘅大將白起嘅故事，恐嚇張唐得罪呂不韋嘅下場恐怕比白起仲慘。張唐果然知驚，乖乖出使燕國。

為咗保護張唐唔受趙國傷害，甘羅跟埋張唐去趙國，仲同趙王講，秦燕結盟係為咗打趙國，不過如果趙國肯送5座城池俾秦國，咁就唔同講法，秦國一定會同趙國結盟打返燕國轉頭。堂堂趙王居然被個?仔說服，乖乖奉上5座城池俾秦國。秦國後嚟信守承諾，同燕國解除聯盟。結果趙國一舉攻打燕國，贏咗30座城池返嚟，仲送咗其中11座俾秦國。結果，秦國不費一兵一卒，靠住甘羅把口就剩賺咗16座城池，可謂係無本生利，甘羅亦都因此拜為上卿，名揚後世。

圖為《宰相小甘羅》劇照，原圖嚟自網絡。