尋日講完張儀，點可以唔提另一位著名縱橫家蘇秦？佢係成語「懸樑刺股」嘅主人公之一，因為被屋企人睇唔起，一於發憤圖強兼苦讀，之後馬不停蹄搵過周顯王、去過秦國同趙國，最終受燕國所託，游說六國合縱抗秦，執掌六國相印，風光無限。

睇返《史記》，蘇秦當年去到燕國，說服燕文侯親近趙國，齊齊抵抗強大嘅秦國，對方仲送咗車馬、金銀等過蘇秦，等佢出使趙國，同趙肅侯傾傾計。蘇秦响趙國侃侃而談，道出自己認為六國嘅土地係秦國嘅五倍，六國應該聯合為一，組成強大聯盟抗秦。佢先後去埋韓、魏、齊、楚，最終成為合縱六國嘅聯盟長。蘇秦送咗份六國盟約過秦國，搞到秦兵十五年無出函谷關。

後嚟秦國出招破壞合縱聯盟，蘇秦就同趙王講去搞掂件事，點知佢一走，六國聯盟就瓦解。蘇秦輾轉去咗齊國，不過齊國嘅大夫唔多中意佢，仲行刺蘇秦。臨死前，蘇秦要求齊王賜佢車裂之刑，兼且要對外公告自己犯下謀反之罪。點解要咁做？原來公告一出，兇手立即現身邀功，最終兇手被齊王誅殺，令蘇秦大仇得報。唐代有句詩或者可以簡單總結蘇秦嘅一生，「六國興亡事系君」，同張儀一樣，蘇秦都係憑住精明嘅頭腦、謀略同口才，推動歷史年輪滾滾向前。

劇照嚟自網絡。