上次講開，湯加國王圖普四世嚟過香港轉機訪問內地，仲好特別咁帶咗四隻錶添。阿史查返資料，原來佢個大仔兼繼任人圖普五世幾年前都嚟過香港，不過喺訪港期間離世。

圖普五世喺2006年接任南太平洋島嶼小國湯加嘅國王之位，無幾耐湯加就不斷爆發騷亂，於是佢推行民主改革，放棄大部分權力，實行還政於民，令國王變成象徵式元首。喺2012年3月，圖普五世靜雞雞訪問香港，諗住遊覽香江，兼且為參加香港七人欖球賽嘅湯加國家隊打氣，但點知突然患上肺炎，峴港政府立即安排到瑪麗醫院接受治療，驗血後證實患咗血癌，之後病情急轉直下，直至3月18日不治。

據講圖普五世彌留之際，主要皇室成員都陪伴在側，包括王儲兼細佬拉瓦卡。一個星期之後，靈車由警方車隊開路駛去機場，以包機形式將靈柩運返湯加，期間警方兩次封咗薄扶林道，方便車隊出入。 

圖為圖普五世，取自網絡。