喺金庸小說《笑傲江湖》入面，衡山派嘅劉正風同日月神教長老曲洋臨終前合奏嘅《笑傲江湖》，係由古曲《廣陵散》改編而成。不過，大家千祈唔好將電影主題曲《滄海一聲笑》同《廣陵散》撈亂，兩者係無關係嘅。

講起《廣陵散》，就不得不提竹林七賢之一嘅嵇康，佢被處死前就彈咗一首《廣陵散》，仲話「《廣陵散》於今絕矣！」不過，嵇康都只不過係將《廣陵散》「發揚光大」，作曲嘅另有其人。根據古代琴曲著作《琴操》所載，戰國時期著名刺客聶政嘅父親係個鑄劍師，因為趕唔切幫韓王鑄劍而被殺死。當時嘅聶政都仲未出世，等聶政大個之後，媽媽就話俾佢知父親身被殺真相。於是，聶政就潛入宮準備刺殺韓王，點知事敗，逃咗入太山。

聶政因禍得福，居然遇著個神仙，佢跟住神仙學音律，然後全身塗滿晒漆，等自己生滿癩痢，又吞炭變聲，仲敲碎埋自己啲牙，以琴師嘅身份入宮。據說，聶政當時演奏嘅曲就係《廣陵散》，佢襯住韓王聽曲聽得入迷嘅時候，即刻抽出收埋喺琴入面嘅刀，成功殺死咗殺父仇人。只不過，聶政殺咗韓王，點都無辦法殺出重圍，又驚自己會連累屋企人於是自毀容貌，最後自殺而死。

原圖嚟自網絡。