繼去年香港首富李嘉誠退休之後，日前恒基地產亦發公告，話主席李兆基亦都考慮退休，交棒俾佢兩個仔李家傑同李家誠。雖然近幾年佢兩位公子分別搵代母生咗幾個小朋友、娶咗徐子淇等，成日上報紙，不過望返四叔年輕時打造地產王國、獨到投資眼光，就知道佢嘅傳奇色彩勁過後代多多聲。

李兆基1928年喺廣東順德出世，細細個就已經幫屋企打理金舖生意。20歲嗰年，李兆基拎住1000蚊嚟香港，响幾間銀鋪掛單，做買賣外匯同黃金嘅生意。後來有唔少內地財主嚟到香港，令外匯同黃金買賣生意非常多，李兆基從中大賺咗一筆。

去到五十年代，李兆基選擇轉做地產生意，1958年佢同馮景禧、郭得勝等8人合股組成永業公司，推出「分層出售、十年分期付款」呢個賣樓方式，令啲樓好快賣晒。到咗1963年，四叔同馮景禧、郭得勝3個人另組新鴻基企業有限公司，被譽為「地產三劍俠」，食住當時香港經濟起飛、人口急速增嘅勢，大力興建中小型住宅，發展得非常順利。到咗1972年，新鴻基上市，「地產三劍俠」拆伙，李兆基分到值5000萬港元嘅地盤同物業，喺1972年就同胡寶星另組永泰建業有限公司，1973年永泰上市，又大賺一筆。

至於恒基兆業有限公司，係李兆基於1976年成立，公司喺1981年上市，帶挈四叔曾經喺1996年登上《福布斯》世界富豪榜第4位，成為亞洲首富。四叔九十年代初同另外三大地產商聯手，投資興建國際金融中心二期，至今恒地已經發展成市值逾2,000億元嘅地產王國。

除咗搞地產有聲有色之外，四叔喺個人投資亦非常了得。佢喺2004年成立「兆基財經企業」，投資香港同海外市場股票，最犀利嘅時候，係佢2003年以每股3.625元認購中國人壽，歷史高位去到成52元，今日收報21.5元，根據報道，如果到而家都未賣，四叔賬面可以賺超過60億，「亞洲股神」稱號當之無愧！

原圖取自網絡。