如果史友有留意開國際新聞，應該會不時聽到中東國家以色列同巴勒斯坦爆發軍事衝突。不過，响1993年，以巴兩國領袖就曾經簽訂和平協議。

以巴衝突可追溯至十九世紀末，當時世界各地嘅猶太人開始試圖返回巴勒斯坦，原因好簡單，因為巴勒斯坦地區係古猶太國嘅地方。不過，已經响呢個地區生活咗唔知幾多年嘅阿拉伯人，對愈嚟愈多嘅猶太人响佢哋嘅地方出現愈來愈不滿。到咗1947年，聯合國就通過將巴勒斯坦地區一分為二，西部隨後成立以色列國。阿拉伯國家就認為呢個係西方國家入侵中東地區嘅陰謀，於是就支持爭取巴勒斯坦人對抗以色列。响1964年，巴勒斯坦解放組織成立，呢個組織獲得阿拉伯國家承認為巴勒斯坦人民唯一合法代表。之後無論係以色列同巴勒斯坦之間，抑或阿拉伯國家之間，都打生打殺，可以咁講，以巴衝突其實唔單止係巴勒斯坦人同以色列人嘅事，背後亦係西方國家同阿拉伯國家之間嘅角力。

不過，响九十年代，以巴兩國領袖就達成和平協議。1993年8月以色列時任總理拉賓同巴勒斯坦解放組織主席阿拉法特响挪威首都奧斯陸秘密會面後達成和平協議，呢份《奧斯陸協議》就喺1993年9月13日，即係23年前嘅今日，响美國白宮簽署，為實現以巴停火踏出重要一步。

可惜嘅係，拉賓响1995年遭到暗殺，後嚟嘅總理內塔尼亞胡對巴勒斯坦採取強硬態度，以巴之後又繼續打生打死。