提起國慶節，除咗有假放，同埋去旅行會人山人海之外，大家仲會諗到咩？有無諗過原嚟古代都有國慶節？仲要早喺唐代就已經開始？

「國慶」一詞，顧名思義係指國家喜慶之事，有唔少外國嘅國慶節係根據國王或君主嘅生日嚟定嘅，而中國方面，明末清初學者顧炎武提過，古代中國喺無慶祝生日呢個概念。據講係因為以前嘅醫療設備差，女性分娩非常痛苦，生仔對於每個媽媽嚟講可以話係搵命搏。所以每個人嘅生日都係媽媽嘅苦難日，生日嗰日應該向母親盡孝，如果母親已經唔喺度，更加要悲傷悼念，不宜慶祝。 

魏晉之後，先漸漸有「生日」呢個概念，並有小型慶祝活動。由唐代開始，皇帝嘅生日開始係件大事，會設宴慶祝。話說唐太宗李世民有一年過生日，同班大臣講咗一番說話，話今日雖然係佢生日，天下臣民都喺度歡喜慶祝，但佢就已經永遠無機會向太后盡孝。喺呢啲悲傷痛苦嘅日子，叫佢點能夠開宴慶祝呢？先唔理唐太宗講呢番話係有心定無意，但都睇得出當時嘅皇帝生日都有返咁上下排場。

去到唐玄宗時期，慶生之風就更加犀利。喺開元十七年，即係公元729年八月初五，唐玄宗牛一，唔單止接受群臣祝賀，仲親自宴請群臣同醉。有好識做嘅大臣請旨提議將每年嘅八月初五定為「千秋節」，每年千秋節放假三日，等全國臣民普天同慶。唐玄宗欣然同意，將千秋節寫入法令，就係咁，古代中國嘅第一個「國慶日」就誕生喇。

圖片嚟自網絡。

資料來源：《金羊網》