提起榴槤，真係有人歡喜有人厭，鍾意嘅就拎去煲雞都得，討厭嘅離遠聞到榴槤陣味已經想走。其實大家又知唔知榴槤個名點嚟？據講係同曾經七次下西洋嘅太監鄭和有關。

據說，明朝航海家鄭和率領船隊下西洋果陣，曾經喺東南亞一座不知名小島度登陸。鄭和一行人喺島上面發現咗全身生滿刺、仲發出陣陣臭味嘅榴槤，有人大膽切開試咗一啖，竟然發覺好好味！於是大家爭相去試，仲食過番尋味。幾日之後，鄭和船隊休整完畢，準備出發，點知班船員居然唔捨得走，鄭和就問佢哋點解喇，佢哋就話係因為榴槤太好食。鄭和話，既然呢種生果咁好食，令大家流連忘返，就叫佢做「流連」喇。後嚟「流連」呢個名，就慢慢發展成榴槤喇。

以上講嘅嘢其實都係傳聞嚟，榴槤個名並唔係鄭和改嘅，不過都算同佢有關。話說鄭和嘅船隊有一個叫做馬歡嘅翻譯，佢曾經跟住鄭和出咗三次海，回國之後寫咗本《瀛涯勝覽》，記載咗呢隻生果：「有一等臭果，番名『賭爾焉』……若臭牛肉之臭，內有粟子大酥白肉十四五塊，甚甜美好吃。」入面提到嘅「賭爾焉」，其實就係榴蓮（durian）嘅音譯。

圖為《鄭和下西洋》劇照，原圖嚟自網絡。

資料來源：金羊網