生命嘅魅力，在於自強不息。2010年菲律賓人質事件令部份家庭陰陽相隔，包括痛失雙親同姨媽嘅汪氏小姐弟。將近九年過去，當年慘劇中倖存的汪綽瑤已經長大成人，由一名中學生變成未來嘅新紥師姐，依段路背後除咗親人嘅陪伴同鼓勵，仲有一位O記警長嘅支持同關懷。

慘劇之後，堅強嘅汪綽瑤到死因庭作供，雖然當時好多人勸佢唔好出庭，避免諗起傷痛回憶，不過佢堅持將自己知道嘅情況講出嚟。佢表示當日槍手坐响旁邊幾次，好勞氣好大聲咁講電話，後嚟傳出槍聲，汪綽瑤即刻匿埋响座位下，最後從緊急逃生門離開旅遊巴。

經歷過槍林彈雨後，汪綽瑤姐弟同姑媽、表哥一齊住，大學修讀傳理系嘅汪綽瑤畢業之後做過記者，跑咗幾年新聞後投身警隊，早排黃竹坑警察訓練學院嘅新一批學警之中，就有佢同警察張湧嘅合照。張湧係有份調查人質慘劇嘅O記警長，報道話佢多年來仍然關心汪氏姐弟，會帶佢哋返教會等等，弟弟當年曾經話過「有位警察叔叔嚟教我哋做功課」。

報道表示，汪綽瑤受到張湧鼓勵而考入警隊，將會度過27個星期訓練，大概响11月畢業。漫漫人生，各位記得珍惜陪伴你走過風雨、度過難關嘅人。綽瑤，期待你正式成為Madam嘅一日，加油！

原圖嚟自網絡。