中學文憑試正喺度如火如荼咁進行緊，應屆DSE嘅考生都忙緊準備應考，講開考試，我哋宜家就有各種考試科目嚟全面評估學生各方面嘅成積，咁古人又係考咩試入仕途嘅呢？

大家都知，古代平民要入朝為官，考科舉係唯一嘅方法，而八股文就係明清科舉考試嘅專用文體，裡面嘅題目主要嚟自四書五經，對字數、起承轉接等要嚴格要求。八股文對於統一錄取人才、防止考生同考官之間串通作弊、減輕考官閱卷嘅工作量有重要作用，不過八股文刻板同內容空泛，仲禁錮咗考生思想，為人所詬病。康熙即位之後，深感八股文對政事幫助不大決定喺所有鄉會考試度廢除。點知此舉引嚟相當大嘅反對同阻力，加上八股文可以抑制異端思想，所以康熙喺幾年之後又全面恢復舊制。

後嚟喺雍正同乾隆時期亦曾提出過廢除八股文，都遭到朝臣勸阻，朝臣雖承認八股文嘅弊處，但認為可「因時而補救之」，令八股文有改良，繼續苟延殘喘落去。直到戊戌變法，光緒下令科舉考試停用八股文，改試策論，不過呢個提議被慈禧太后為首嘅勢力反對，八股文喺幾個月之後依然無被廢除。1900年八國聯軍侵華，清廷先痛定思痛。1902年，清廷宣佈正式廢除八股文，所有鄉試、會試等考試一律唔準用八股文。

圖為《清代待試圖》，原圖嚟自網絡。