袁世凱稱帝嘅事跡，大家都聽唔少，阿史今次就想講吓袁世凱稱帝嘅幕後推手──楊度。有「湖南才子」之稱嘅楊度去過日本留學，喺清朝推行新政之後回國，獲袁世凱同重臣張之洞保薦，大讚佢「精通憲法，才堪大用」，於是楊度成功喺清朝內閣任職。直至武昌起義，楊度就成為袁世凱幕僚，深得信任。

喺1915年4月，楊度發表咗篇《君憲救國論》，提到「中國如不廢共和，立君主，則強國無望，富國無望，立憲無望，終歸於亡國而已」，文中極力鼓吹中國實行君主立憲，得到袁世凱讚賞。同年8月，楊度聯同孫毓筠、嚴復、劉師培、胡瑛等，發起成立「籌安會」，為袁世凱稱帝製造輿論，仲搵嚟乞丐請願團、妓女請願團、人力車夫請願團等造勢，「請求」袁世凱稱帝。最後，國民代表大會以絕對多數票，批准咗君主制，而袁世凱喺各省假民意代表兩次請求下，「唔情願」咁同意就任中華帝國皇帝，並定1916年為「洪憲元年」。

圖片為楊度和袁世凱，取自網絡。