現今香港社會並無死刑，係立法局响26年前嘅今日通過廢除死刑嘅結果。由二次世界大戰後計算，香港一共有122人被處決，包括干犯戰爭罪行嘅日本人、犯咗謀殺罪嘅華人等，當中以1962年三狼案3名主犯馬廣燦、李渭同倪秉堅較廣為人知。香港最後一次執行死刑，要數到去1966年，越南籍男子黃啟基因劫殺罪而被判刑。

香港以前包括謀殺罪在內嘅嚴重罪行都會喺最高法院（即係而家嘅高等法院）審理，喺陪審團大多數裁定罪成之後，法官都會按照英國慣例，喺判處死刑之前頭披黑方巾，阿史記得1997年嘅《算死草》都有過呢一幕。法官宣判時仲會讀出「吊至你氣絕」、「願上帝庇佑你之靈魂」等句子。死囚之後會被收柙喺設有絞刑台嘅赤柱監獄H座「死囚倉」，期間允許家屬探訪、放風，同埋同宗教人士見面告解，但就無得接觸其他在囚人士。如果死囚無上訴或者上訴失敗，就會由港督決定行刑日期，死期會一直保密，直至行刑前嘅黃昏，死囚先知自己食緊「最後嘅晚餐」，並喺第二朝以繯首之刑吊死。

處決之後，死囚遺體由當時嘅監獄處管理，家屬唔可以瞻仰遺體，亦唔會舉行任何超渡儀式，直接埋葬喺赤柱黃麻角道監獄墳場，樹立一個只有編號嘅無名碑。當時死囚嘅下場，好似過咗身都要繼續「囚禁」，無法自由，死囚落葬七年之後會起骨，最終送去沙嶺公墓或海葬。

圖片為《算死草》劇照及懲教博物館，取自網絡。