月中去中大聽咗日本獨立記者和仁廉夫嘅「遙遠的民間戰爭賠償-香港軍票索償訴訟」公開講座，今日同大家繼續分享多少少。唔少史友都知，喺第二次世界大戰期間，香港淪陷三年零八個月，日本仲強制香港人將所有港幣全部兌換成軍票，從而換取大量港幣去澳門買軍備所需。但原嚟呢啲被日軍強行沒收嘅港幣唔止用嚟買軍備，仲有特別用途。

日本戰敗投降之後，大阪市田野嘅防空洞喺1948年10月發現大量香港同越南硬幣，數量多達10噸。究竟呢啲硬幣有咩用？據和仁廉夫講解，日軍大量收埋呢啲硬幣，係諗住熔咗佢哋，再拎啲金屬嚟打造武器。當然，呢啲由其他國家搶掠返嚟嘅財產，喺戰後都被日軍據為己有，用嚟做買賣等。
原圖嚟自網絡。